एमालेद्धारा बहुपहिचानका आधारमा ७ प्रदेशको प्रस्ताव

७ असार, काठमाडौं । नेकपा एमालेले बहुपहिचानका आधारमा ७ वटा प्रदेश बनाउने प्रस्ताव अघि पारेको छ ।

पार्टी मुख्यालय बल्खुमा जारी केन्द्रीय समितिको बैठकमा अध्यक्ष झलनाथ खनालले स्थायी समितिको तर्फबाट साझा पहिचानका आधारमा ७ प्रदेश बनाउने प्रस्ताव गर्नु भएको हो । प्रस्तावित प्रदेशहरुमा किराँत-लिम्बुवान-कोशी, ताम्साङलिङ-नेवा-बाग्मती, मगराँत-तमुबान-गण्डकी, भेरी-कर्णाली, सेती-महाकाली, मिथिला-भोजपुरा-जनकपुर र थरुहट-अवध-लुम्बिनी रहेका छन् ।

एमालेले आयोगमार्फत संविधान बनाउने र संसदको निर्वाचन गरी आयोगले बनाएको संविधान अनुमोदन गर्ने प्रस्ताव गरेको छ ।

एमालेले संविधान निर्माणमा अहिलेसम्म भएका काम तथा संविधानसभा विघटन हुनुको कारणबारे श्वतपत्र जारी गर्ने भएको छ । सचिव शंकरको संयोजकत्वमा गठित समितिमा प्रदीप ज्ञवाली, भीम रावल, रघुबिर महासेठ, थममाया थापा अग्नि खरेल र विन्दा पाण्डे रहनु भएको छ ।

एमालेले अन्तरिम संविधानको धारा ३८ आधारमा एकीकृत नेकपा माओवादी वाहेकको नेतृत्वमा सहमतीय सरकार गठन गर्नु पर्ने प्रस्ताव गरेको छ । साथै प्रधानमन्त्रीको राजीनामाका लागि सशक्त दबावमुलक आन्दोलन गर्ने अध्यक्ष खनालको प्रस्ताव छ ।