खस-क्षेत्रीको पूर्वाञ्चल बन्द फिर्ता

१२ फागुन, झापा ।

 खस-क्षेत्रीलाई पनि आदावासी जनजातिमा सूचीकृत गरिनुपर्ने तथा खसान राज्य हुनुपर्ने लगायतका विभिन्न नौ सूत्रीय माग राखेर खस-क्षेत्री एकता समाजले आहृवान गरेको पूर्वाञ्चल बन्दको कार्यक्रम फिर्ता भएको छ ।

बन्द फिर्ता भएपछि पूर्वका १६ वटै जिल्लाको जनजीवन सामान्य भएको छ । झापा, मोरङ, सुनसरी, उदयपुरलगायतका जिल्लामा बिहानैदेखि यातायतका साधन पूर्ववत अवस्थामा चलेका छन भने बजारपसल तथा शिक्षण संस्था पनि खुलेका छन् । समाजले आफ्ना माग पूरा गराउन सरकारलाई दबाब दिने भन्दै बिहीबारदेखि तीन दिनसम्म पूर्वाञ्चल बन्दको घोषणा गरेको थियो ।

शान्ति तथा पुनर्निर्माण मन्त्रालयले बन्द फिर्ता लिन तथा वार्ताका माध्यमबाट समस्या समाधान गर्न आग्रह गर्दै समाजलाइ बिहीबारै पत्राचार गरेको थियो । पत्रलाई सकारात्मक रुपमा लिँदै बन्दलगायतका आन्दोलनका कार्यक्रम तत्कालका लागि स्थगन गरिएको समाजले जनाएको छ ।