नुवाकोटमा बस दुर्घटना हुँदा पाँच जनाको मृत्यु

१६ पुस, नुवाकोट । 

नुवाकोटको त्रिशुलीस्थित दुई पिपल गाविस-२ देउरालीमा शनिबार भएको बस दुर्घटनामा पाँच जनाको मृत्यु भएको छ । दुर्घटनामा ११ जना घाइते भएका छन् ।

काठमाडौंबाट देउराली जाँदै बा २ ख ६३४६ नम्बरको बस सडकबाट झण्डै दुई सय मिटर तल खसेको प्रहरीले जनाएको छ । मृतकमध्ये दुई पिपल-१ का चेतबहादुर लामिछाने र दुई पिपल-७ टंकप्रसाद दहालको मात्र सनाखत भएको छ ।

अन्यको भने सनाखत हुन बाँकी छ । घाइतेहरुलाई उद्धार गरी अस्पताल लगिएको छ ।